******* ثوره التغيير ****
قصيده للشاعر // على عبد الرازق صالح احمد
// المعصره // الفتح // اسيوط // ت // 2763004 // 088
********************************************************
يا ثوره التغيير من الفساد والظلم
شفتك يا ثوره بعيني بعد ماكنتٍ حلم
رحت اهني العيال والولاد والعم
صرخوا ولادي وقالوا دا حلم والا علم
معقول نقدر نغير كل الضلال والوهم
تلاتين سنه فى الفساد نغيرها من غير دم
دا احنا مع حكومه تسمع دبه النمله
واللى يحاول يغير يزقوه المرار والسم
وآمن دوله غليـظه فاجره وعتاوله
تحكمها شله فساد هايفه بنص كم
لا شرع فى عرفهم والا يعرفوا القوانين
وقُلت لنفسي فى نفسي ياعم ثوره ايه
دلوقت تقوم الحكومه وآمن دوله تلم
واللي امه داعيه عليه يقع فـــ قبضتهم
راح ينسى دينه واهله وينسى الاب ويا الام
وينسى يوم ما اتولد وقال فيه ايه
ويضربوه بالصرم ويزقوه كاسات السم
رودتني كل الشكوك من كتر ما شفت هم
وقُلت يا عم روح نام يا عم نام بلا هم
وفجئه صحوني العيال قُولت يارب خير
قالولي شوف الميدان مليان جمال وحمير
قولت الله اكبر؟ الاهلى غلب الزمالك فـــ
فــ وسط جمهوره وانقلبت المعايير
قالولي صحصح وفووق اهلي وزمالك مين
ياعم دا ثوره وقامت اسمها ثوره التحرير
ثوره خلعت ما خلت من وزير لــغفير
خلعت رجول الدكك واللزقه بالمسامير
خلعت كبير النظام اللي غرروا بيه
وقالوا ان البلد طول حياتها فــــ خير
وخلعت عز وسرور وغالي والمداكير
وجمال واحمد نظيف وجرانه وولده زُهير
وشهاب وزكريا عزمي ونواب مجلس التمرير
ودرويش وابو العيون والعادلي ابو التقارير
وخلعت حرامي الشقق والهدم والتدمير
وخلعت حرامي الحديد ابو الطبل والمزامير
وخلعت السبعه الكبار فــــــــــــ وزاره التكفير
كانوا جلادين النظام كلاب بوليس مساعير
حمدت كتير ربنا ووقغت دقيقه حداد
ودعيت ربي يفرق بينا وبين شله التدمير
ولعنت زمن الفساد واللى كانوا فاسدين
ورُحت كاسر وراهم الف قُله وزير
**********************************************
ليست هناك تعليقات:
إرسال تعليق