أنا مين ؟
أنا نفسي مش عارف
أنا مين؟
معرفش ليه خايف
وحزين
أوقات بِحس إنى الفارس
وكتير بكون بين التايهين
بضحك
وعيني ماليها دموع
واحزن
وصوت ضحِكي مسموع
واحلم فى عِز الضهريه
وانام فى بحر ما مِنه طلوع
أنا نفسى مش عارف
أنا مين؟
أحوالي ليه مش عجباني
وكتير بقاوم وبعاني
برئ وفى عنيهم جاني
راضين بظُلمي وقالوا
أمين
أنا نفسي مش عارف
أنا مين؟
إنسان
غير الناس أغلبها
لا رضيت
ولا ارضي بعذابها
ومسحت م الدنيا
سرابها
وزرعت م الأحلام
بساتين
أنا نفسي مش عارف
أنا مين؟
جمعت شوقي فى أمنيه
بتمني أشوف الحريه
يتصالح الكون حواليا
نكون بجد . بنى أدمين
أنا نفسي مش عارف
أنا مين؟
عاقل أنا ولا المجنون
خاين أنا ولا المخيون
نفس الملامح والمضمون
إنسان بسيط تايه مسكين
أنا نفسي مش عارف
أنا
مين؟
كلمات \ أحمد شاهين
ليست هناك تعليقات:
إرسال تعليق