(يوميات موظف حكومى)
-------------------------
ب اقوم الصبح اغسل وشى
والبس خلقاتى وبعدين امشى
واطلع على شغلى طوالى
مرسوم ع السنجة ومنشى
والساعة فى ايدى مظبوطة
ونضارة وكرفتة مربوطة
وبالثانية ف ميعادى تلاقينى
ع المكتب ملفاتى محطوطة
وانا ب افطر فول مع جرجير
وكلاوى وجبنة وفطير
ووراهم شاى ف الخمسينة
والناس على بابى طوابير
وانا ب افطر ابص ف الساعة
دى صلاة الظهر ياجماعة
واجرى بسرعة اتوضى
واصلى الظهر فى جماعة
واسيب الناس واقفة طابور
مطحونة ياناس ليها شهور
واللى يجينى ف يوم متاخر
اقول له عداك الدور
وعلى الحال ده تلاقينى يوماتى
على راحتى والناس بتهاتى
ومصالح الخلق عطلانة
بسبب الروتين فى حياتى
مجدى زيادة.
ليست هناك تعليقات:
إرسال تعليق