يوميات فلاح مصري
فلاح قراري فى وادي النيل
فرعون ومصري وعرقى أصيل
الزرع دمي وعروقي
والطمي لوني فى خدودي
والأرض فرشي ومتاعي
احضنها فى قلبي وبدراعي
دي ميراث أبويا واجدادي
والزرعة زادي وزوادي
فى الفجر اصحي بشوق وحنين
وأجري عليها وابوس فى نجيل
أعزق بايدى كده بالفاس
واحرث بشدة بالمحراث
ويجره بقرة او عجل كبير
و اسقى بدمي ومية نيل
وارفع واروي كده بشادوف
وطنبور يلف كتير ويدور
او ساقية برضه يجرها تور
ترفع وتسقى بهنا وسرور
وابذر بذور فى الأرض كتير
ويدوس عليها غنم وحمير
ويغرسوها بأقدامهم
و يثبتوها بأعمالهم
ويوم الحصاد وكأنه العيد
الكل يحصد كده وسعيد
ده خير بلادنا واراضينا
يسعد قلوبنا ويرضينا
قمح وذرة او فول او عدس
وتوم بصل او حلبة و خس
و برتقال او حتي ليمون
سمسم وخروع او زيتون
وفى الزريبة نربي كتير
عجول واغنام ويا حمير
وفراخ حمام مع وز وبط
ونجيب لبن والبيض يتحط
و كمان بسرعة وبدون كسل
نعمل فى حتة منحل عسل
والفرن بلدى لخبيز عيش
وبتاو مشلتت بجبنة قريش
ونجوز البت بهانة
وفرحها يبقى على هوانا
ونحمد ونشكر كتير وقليل
عشان اتخلقنا فلاحين.
مع تحيات الفقير إلى الله
ياسر شرف 
ليست هناك تعليقات:
إرسال تعليق